Aaj kal YouTube humare daily life ka hissa ban gaya hai. Hairstyle banani ho, ya kuch samajh na aa raha ho, to YouTube sab kuch bata deta hai. Ab sawal ye hai, kya IIT JEE jaise competitive exam jisme 1.6 Million bachhe 2025 me compete karenge uske liye bhi kya YouTube utna hi helpful hai ki nhi? Maine 1 Mahine se jayada time lagakar 100+ MMATuition coaching ke alumni students se puchkar ye pata kiya ki kya YouTube ke sahare IIT JEE crack karna sach mein possible hai?
Ab sabse pahle aapke man me ye sawal aa sakta hai ki hum tumhari baat ka yakin kaise kare? To main aap sabhi ko bata du ki main ek Rajeev Kansal pichle 10 saalo se MMATuition coaching center run kar raha hu jaha 10000+ students abhi tak merese teaching le chuke hai. Iske alava me Delhi me RPVV Lajpat Nagar ka ek jana mana maths teacher bhi hu. To obviously mene kai ese students ko bhi padaya hai jo IIT pass-out hai.
Kya kisi ne Youtube se padkar IIT-JEE advance crack kiya hai?
Ha mere school RPVV Delhi 2019 batch me ek bachhe ne keval youtube and online sources se IIT-JEE advance crack kiya hai. But ab 2025 me itne competition me kya Advance youtube se crack karna possible hai? Dekho 2019 ke mukable bhale hi competition bada ho but aaj 2025 me youtube me pahle ke mukable kahi jyada content available hai. Agar aapko sahi content kab aur kaha dekhna hai ye pata lag jaye to aap bhi 2025 me keval youtube se IIT JEE advance crack kar sakte hai. In reality Iss samay competition itna jyada hai ki hardwork to sab bacche utna hi put in karte hai but jiska overall IQ jyada hai uske liye exam crack karna jyada easy rahega.
Iss student Aditya ne only youtube se Alakh Pandey and other youtube channel se padkar na kewal IIT JEE me 3000 AIR li balki NEET me bhi 682 marks ke saath AIIMs crack kiya tha in 2022. Iss student ki backstory bhi bahut dilchasp hai. Inhone apne maa ke saath Alakh Pandey Sir ke samane apne childhood stories bhi share ki hai. Agar aap inki story me interested hai to ye video jarur dekhe.
Kya youtube IIT JEE advance ke liye sufficient hai?
Aditya ki story dekhkar aapko ab tak pata to lab gaya hoga ki youtube sufficient hai not only for JEE advance but for NEET too. Aaj ke time mein, kai IITians aur experts YouTube par apne channels chalate hain. Kaafi educators toh khud IIT se hai, jo free mein padha rahe hain, aur kuch bade coaching centers bhi apne channels pe content share karte hain. Yeh channels aapko basic concepts samjha sakte hain, aur aapko exams ke liye tayar karne mein bhi help karte hain. Lekin, ek limitation hai—yeh videos aapko sirf basics mein madad karenge, lekin advanced level tak pahunchne ke liye aapko books aur practice zaroor chahiye hogi.
Kya Sirf YouTube Ke Videos Se IIT-JEE advance ki Tayari Puri Ho Sakti Hai?
Bilkul, agar aap focused hain aur distractions ko side mein rakh sakte hain, toh YouTube ke sahare bhi tayari possible hai. Lekin, kaafi aspirants ke saath hota yeh hai ki wo lecture dekhte-dekhte kab kisi random video pe chale jaate hain, pata hi nahi chalta. Ek topper Aditya ka example lete hain—wo sirf YouTube aur books ke sahare hi padhai karta tha aur AIR 3000 lekar aaya. Uska ek structured plan tha, aur wo apni padhai ko lekar consistent tha. Aap bhi aise consistency aur discipline ke sath padhai karte hain toh YouTube bhi apke liye ek bahut useful resource ban sakta hai.
Student story of IIT-JEE preparation with Youtube
Jaisa mene blog ke start me bataya tha ki mene 100+ students se unke IIT-JEE ke youtube se sikhne ke experiences ko puchha tha. To unhi me se kuch brilliant students ke valuable life lessons niche unhi ki jubani aapke saamne hai.
1. YouTube Ko Ek Supplement Ki Tarah Lo, Substitute Ki Tarah Nahin
Kaafi students ke liye YouTube ek strong supplement ban sakta hai, jo coaching ke saath milke unke concepts ko strong karta hai. Jaise ek student ka kehna hai:
“Maine YouTube videos ko apne Fiitjee coaching ke saath use kiya. 11th ke starting mein maine Physics Wallah ke lectures follow kiye taaki main class mein thoda aage chaloon. Lekin mujhe laga ke woh coaching ke level tak nahi tha, toh 3 mahine baad maine band kar diya. Baad mein jab mujhe kuch topics mein clarity ki zaroorat thi, toh Mohit Tyagi aur Unacademy ke lectures use kiye fluids aur coordinate geometry ke topics mein.”
2. Alag Subjects Ke Liye Alag Channels
JEE ke case mein sabhi YouTube channels useful nahin hote, aur apne subjects ke hisaab se sahi channel choose karna important hai. Students ne kuch top channels recommend kiye hain jo unke liye kaam kiye:
Physics Wallah: Beginners ke liye Physics Wallah ek best choice ho sakta hai jo basic concepts ko whiteboard par easily samjhate hain. Ek student ne kaha, “Physics Wallah ne mere 11th ke physics basics ko strong banaya aur meri confidence build kiya.”
Unacademy JEE: Unacademy JEE kaafi structured hai aur specific experts hain subjects ke liye. Ek student ne bataya ke unhone Sameer Sir ke saath Unacademy ke JEE Live Daily 2.0 series se apna pura Maths cover kiya
Josh Talk JEE: Motivation ke liye yeh channel best hai. Vese to motivation internally apke man se aana chahiye but agar kabhi kabhi down feel karo to Josh Talk un kuch youtube channels me se ek hai jo aapko motivational stories se josh se bhar dega.
Sahi channel ka selection kaafi farak la sakta hai. Lekin jaise yeh students samjhe, coaching materials aur textbooks ke saath combine karna zaroori hai
3. “One-Shots” Se Bacho, Consistency Mein Power Hai
Kaafi students “one-shot” videos pe rely karte hain, jahaan ek hi lecture mein pura chapter cover ho jata hai. Yeh tempting lagte hain jab time kam ho, lekin inme depth aur detail miss ho sakti hai. Ek student ne warn kiya:
“YouTube useful hai extra clarity ke liye, lekin one-shots pe zyada depend mat ho. Agar serious prep kar rahe ho toh structured study hi best hai. Apne coaching syllabus par focus karo aur one-shots se jitna ho sake, bachke raho.”
Physics aur organic chemistry jaise subjects mein, jahaan concepts ek dusre se linked hote hain, one-shots usually sufficient nahi hote. Consistent, regular practice from multiple resources zaroori hai.
4. Revision Aur Reinforcement Ke Liye YouTube
YouTube ka real value tab dikhayi deta hai jab revision ka time aata hai. Jab exams ke 1-2 mahine bache hote hain, har book aur coaching material ko revisit karna overwhelming lagta hai. YouTube ke structured playlists aur concise videos fast recap ke liye kaafi helpful hote hain. Ek student ne bataya:
“YouTube revision ke liye ek best platform hai, especially last ke kuch mahino mein. Physics Galaxy ke revision checklists aur JEE Wallah ke one-shot videos ko exam ke pehle use kiya.”
YouTube ka flexibility, jahan tum specific areas ko pause aur replay kar sakte ho, yehi isko perfect banata hai revision ke liye. Lekin yaad rakho—yeh revision videos bas reinforce karte hain jo tum already pad chuke ho.
5. Reality Check: Sirf YouTube Se IIT Nahin Crack Hota
Kaafi students ke liye YouTube kuch topics mein sufficient support provide kar sakta hai, lekin high rank achieve karna sirf is par depend karne se mushkil hai. Ek student ka kehna hai:
“Sirf YouTube dekhne se JEE ka accha rank lana difficult hai. Itni easy accessibility ke saath competition har saal tougher hota ja raha hai. Last mein jo tumhara dedication hai wahi matter karta hai.”
YouTube par kaafi variety hone ki wajah se distractions bhi hain, aur bina discipline ke students often unrelated videos par chale jaate hain. Toh clear study plan zaroori hai aur tumhe sirf woh channels aur videos dekhne chahiye jo tumhare goals ko support karte hain.
6. Self-Study Aur Practice Non-Negotiable Hai
YouTube lectures aur coaching materials concepts toh samjhate hain, lekin practice hi success ka key hai. Ek student ne recommend kiya ke apne study time ka 70% problem-solving mein lagao aur 30% lectures pe, aur bola:
“Accha rank lana hai toh har chapter mein kam se kam 100–150 questions solve karo. Practice is everything; lectures akeli kaafi nahi hongi.”
Consistent practice tumhare understanding ko reinforce karti hai aur weak areas ko identify karne mein help karti hai. YouTube ise support kar sakta hai, lekin books jaise Cengage, Arihant, aur HCV ko bhi solve karna essential hai, jo JEE ke advanced level ko cover karte hain.
7. Balance Find Karo: YouTube Ko Larger Study Strategy Ka Part Banao
Ultimately, YouTube ek supplementary resource ke taur par best kaam karta hai JEE prep ke liye. Students ko apne main study materials par focus karna chahiye—chahe woh coaching institutes se ho, textbooks ho, ya online courses—aur YouTube ko backup ke taur pe use karna chahiye specific challenges ya revision ke liye.
Ek student ne achhe se sum-up kiya:
“Agar tumhare studies mein consistency hai aur YouTube ka use discipline se karte ho toh yeh ek fantastic resource ban sakta hai. Lekin agar tum easily distract hote ho, toh better hai kisi aur structured method pe focus karna. JEE mein success dedication se aati hai, aur YouTube bas us journey ka ek hissa hai.”
Final Thoughts
YouTube ne students ke padhai ka tareeka bilkul badal diya hai, jo ek flexible aur wide array of perspectives offer karta hai. Lekin, IIT JEE jaise exams mein success ke liye structured plan, consistent practice, aur reliable resources ki zaroorat hoti hai jo sirf videos ke through possible nahi hai. Agar wisely use kiya jaye, toh YouTube conceptual clarity aur revision support provide kar sakta hai, lekin asli mastery dedication aur practice mein hi hoti hai.
Personal Experience of Youtube Study
Personally ek professional math teacher hone ke bawajood kabhi agar mujhe koi concept revise karna hota hai to main youtube ko prefer karta hu. Ha main manta hu books se math question practice karne se behtar aur koi tarika nhi hai. Par agar aapko kisi concept me doubt hai ya school me koi backlog chut gya ho to youtube is best. Iss note ke saath main aapko yahi chodna chahunga. Thanks for reading this lengthy research of mine about “Can I crack IIT-JEE advance with Youtube?” and my answer is Yes, but it depends on your hardwork and consistency. BYE!
I am Rajeev Kansal a Math teacher from last 15 years in a Delhi Government school in RPVV Lajpat Nagar. I have expertise in CBSE Math and class 6 to class 12 board student problem-solving related to studies and exams such as IIT-JEE, NEET, CUET etc. In addition to that I have a Local Tuition in Faridabad to help students for the last 10 years.